Mata'g TIKI

kini nga balak kinuha ra sad nako sa internet nga nakadani sa akong duha ka mata og sa akong utok nga gamay mao na akong gikuha ang maong balak... mao na nga link mga bai

Ang Mata'g Tiki

Kon imong pasagdan,
ang gamayng samad sa dughan,
simbako'g kamayohon,
magnana kini, ug lisod nang ayohon.

Magnangnang, mag-umido, magngulngol
mobutirik, moanam pagbugdol;
mahimong hubag nga may bungtod puti
nga ilang gitawag ug mata'g tiki.

Kondili gihapon nimo atimanon,
kay imo lang agwantahon,
mosamot kini pagburot, mo-anam pagkaylap,
ang kasakit magsugod pag-uylap.

Kon ugaling di na maantus,
ang nagasanting nga kahapdos,
imong pamahala-an pagtusdik
ang hubag nga nagbutirik.

Inigtuslok mo sa mata'g tiki,
mosudlot ang nana nga puwa'g puti,
mo-igos, mo-agas, mamilitpilit,
sama sa mga politikong bulingit,
nga nagkamayo,
sulod sa dughang samaran,
sa alaut tang yutawhan.